Юрий Михайлис: «Қазақстан құрамасы батыл команда болады»

Хоккейден Қазақстан құрама командасына Нұр-Сұлтан қаласында алдағы әлем чемпионатына дайындық жалғастырып жатыр. Оқу-жаттығу жиынының екінші кезеңі Ригада өтеді. Сол жерде біздің құрама Латвия командасына қарсы екі жолдастық кездесу жоспарлап отыр. Ұлттық құрама команданың бас бапкері Юрий Михайлис жоспарымен бөлісті.

– Біз әлем чемпионатына қатысатын құрамнан көрінеді деген ойыншылардың басын қостық. Бірақ, қазір Қазақстан чемпионатында ойнап жатқан Данияр, Нұрғалиев, Рахманов, Полохов, Румянцев сияқты ойыншылардың көмегіне әзірше жүгіне алмаймыз. Сонымен қатар Құрлықтық хоккей лигасы маусымының аяқталғанын күтіп отырмыз. Лигада Акользин мен Дитц өнер көрсетіп жатыр. Сведберг, Волк және Блэкер Ригада командаға қосылады. Сондықтан да батыл құрама болмақ.

– Қазақстан чемпионатының барысын қарадыңыз ба? 

– Иә, «Сарыарқа» – «Номад» арасындағы ойындарды көрдім. Қарағандыға барып та қарадым. Жақсы ойындар болды, маған ұнады. Ұлттық құрамада болатын ойыншылар ерекшеленіп тұрды.

– Ұлттық құрамада ойнау мүмкіндігі барлық ойыншыда бар ма? 

– Әрине, барлық жігіттер барын салып, өздерін, жақсы қырларын көрсеткілері келеді. Бәрінде мүмкіндік бар.

– Қақпашылар туралы Алексей Шиминмен ақылдасып шешесіздер ме?

– Иә, онымен бірлесіп шешім қабылдаймыз.

– Былтырғы әлем чемпионатында Никита Боярин негізгі қақпашы болған еді. Биылғы маусымда оның ойын тәжірибесі жеткілікті болды ма?

– «Номад» құрамында жақсы ойындар өткізді. Тәжірибе жинақтады.

– Бірақ көп ойын өткізген Сергей Кудрявцев емес пе?

– Иә. Бірақ бізде  қатарынан екі жыл Қазақстан чемпионатында үздік қақпашы атанған Румянцев бар. Оны да бақылап көреміз.

– Жасөспірімдер құрамасының ойындарын көрдіңіз бе? Кімді атап өте аласыз?

– Логвин ұнады. Ең бастысы шайба соға алады. Сезімталдығы бар. Жас ойыншы. Келесі жылғы чемпионатқа жастарды да қосамыз деген үміттемін.

ҚХФ бас серіктесі – «Самұрық-Қазына» ҰӘҚ» АҚ

ҚХФ серіктесі - Sport Qory спортты қолдау қоры