Сергей Кудрявцев: «Құраманың өткен жылғыдан жақсырақ өнер көрсетуге барлық мүмкіндігі бар»

Қазақстан құрамасының алдағы әлем чемпионатына қатысатын кеңейтілген тізімінде төрт қақпашы бар. Олардың арасында ЖХЛ-дың тұрақты чемпионатында «Южный Урал» үшін 38 матч өткізген Сергей Кудрявцев бар. Sports.kz-ке берген сұхбатында голкипер әлем чемпионатына дайындығы туралы айтып берді.

- Сергей, өткен маусым өзіңіз үшін қалай болды?

- Жалпы алғанда, маусым жаман болған жоқ. 38 матч ойнадық және мен жақсы ойындар нашарларынан көбірек болғанына қуаныштымын. Жоғарғы лиганың деңгейі өте жақсы – тең түсетін командалар көп, бәсеке өте жоғары.

- «Барыстан» «Южный Уралға» өткеніңізге өкінбедіңіз бе?

- Мүлдем өкінбедім. Плей-оффқа өтпегенімізді ешқалай ақтай алмаймыз – кіруге міндетті едік. Чемпионат соңында бізге көмектесетін керекті ұпайларды жоғалттық.

- Орскіде келесі маусымға қалдыңыз, неліктен қалам деп шештіңіз?

- Маған көп ойнаған ұнайды, бапкерлер мен басшылықтың сенімі бар – сондықтан келісімшартты создыруға бел будым.

- Өткен жылғы үзілістен кейін құрамаға шақырады деп күттіңіз бе?

- Шынымды айтсам, мен бұл жөнінде мүлдем ойламадым. Шақыра ма, шақырмай ма деген күмәнмен басымды қатырғым келмеді. Алайда шақырғанда таңғалмадым – чемпионат соңына қарай қоңырау шалулары мүмкін екенін түсіндім.

- Қандай сезімдесіз? Дәл қазір Қаақстан құрамасының бірінші қақпашысы атануға дайынсыз ба?

- Тамаша сезімдемін, осында болғаныма қуаныштымын. Қазір қақпашылар арасында үлкен бәсеке бар, алайда қақпадағы орын үшін күресуге дайынмын.

- Қалай ойлайсыз, Қазақстан командасының өткен жылғыдай Әлем чемпионатын шулатуға мүмкіндігі бар ма?

- Менің пікірім — құраманың өткен жылғыдан жақсырақ өнер көрсетуге барлық мүмкіндігі бар. Егер барлығы бір-бірі үшін тартысып, барын салса, сонда ғана алға қойған мақсатқа жетуге болады.

ҚХФ бас серіктесі – «Самұрық-Қазына» ҰӘҚ» АҚ

ҚХФ серіктесі - Sport Qory спортты қолдау қоры