Корней Корнеев: «Мақсатым – ҰХЛ-да ойнау»

Қазақстандық тағы бір ойыншы ҰХЛ Орталық скаутинг бюросының алдын ала тізіміне енді. Корней Корнеев Квебектың Басты юниорлық лигасында «Викториавилл Тайгерз» командасының сапында өнер көрсетеді. Болжамға сәйкес, ол Солтүстік Америка ойыншылары арасында тізімде 174-орында тұр. 18 жастағы шабуылшы IA дивизионында өткен соңғы әлем чемпионатының үздік бомбардирі атанып, 12 (6+6) ұпай жинады. Турнирде Қазақстан құрамасы екінші орын алып, элиталық дивизионға шыға алмады. «Sports.kz» басылымына берген сұхбатында Корней Корнеев Солтүстік Америкадағы мансабы және ұлттық құрама сапында ойнау тәжірибесі туралы әңгімелеп берді. - Корней, әлем чемпионатын еске түсірейік. Неліктен турнирдің басталуы сәтсіз болды — Украинадан жеңілдіңдер, ал жолдастық кездесуде ұтқан словениялықтарды негізгі уақытта жеңе алмадыңдар. Бұл қарсыластар туралы не айта аласың? - Біз үшін алғашқы екі матч мықты қарсыластарға қарсы аса сәтті өткен жоқ. Менің ойымша, қысым мен қобалжу болды, сол себепті қателіктерге жол бердік. - Ең қиын матч, сірә, норвегиялықтарға қарсы ойын болды. Неліктен жеңілістен, әсіресе мұндай ірі есептен, қашып құтыла алмадыңдар? - Норвегияға қарсы матч ең ауыр ойындардың бірі болды. Дегенмен, біз бұдан да жақсы ойнай алатын едік. Ойынның басында үш рет айып алдық, сол кезде үш шайба өткізіп алдық. Менің ойымша, бұл бүкіл ойынның барысын бұзды, ал мұндай бірінші кезеңнен кейін есепті теңестіруге дайын болмадық. - Команданың нәтижесіне қарамастан, сен турнирде ең көп ұпай жинадың, әрі бұл құрамаларда бұрын ойнамағансың. Жоғары нәтижеге жетуге не көмектесті? - Иә, бұрын бірге ойнамаған жігіттермен шықсам да, ең көп ұпай жинай алдым. Бірақ бұған Солтүстік Америкадағы ойын тәжірибем көмектесті деп ойламаймын, себебі ол жақта деңгей одан да жоғары. - Екінші орын – лайықты нәтиже ме, әлде одан да жоғары нәтижеге қол жеткізуге болар ма еді? - Екінші орын, әрине, ең үздік нәтиже емес. Бірақ менің ойымша, Норвегия бізден күштірек болды, сондықтан бірінші орынды солар алды. - Қазір клубтағы жағдайың қалай? Екінші маусым ойнап жүрген лигаң туралы айтып өтсең. Осы маусымдағы мақсаттарың қандай? - Маусым басында мені басқа командаға ауыстырғаннан кейін бәрі жақсы жүріп жатыр. Ойын уақытым көбейді, ұпай да жиі жинай бастадым. Қазір команданың басты мақсаты — плей-оффқа шығып, мүмкіндігінше алысқа бару. - Әлем чемпионаты кезінде ұсыныстар болды ма? Скауттардың саған қызығушылық танытқаны айтылды. - Әлем чемпионатында скауттар аса көп жақындаған жоқ, негізінен жай сөйлесті, болашаққа жоспарларымды, мансабымды қайда жалғастырғым келетінін сұрады. Бірақ ол кезде бұл ең маңыздысы емес еді. Ең бастысы – чемпионатта жақсы ойнау, ал содан кейін ғана қандай да бір келіссөздер жүргізу. - Хоккейдегі болашағыңды қалай елестетесің? - Әрине, хоккейде болашақты болжау қиын, бірақ әркімнің өз мақсаты бар. Менің мақсатым — ҰХЛ-да ойнау. - Ұлттық құрамадағы ойын тәжірибесі мансабыңа қалай көмектеседі? - Маған әрдайым құрамаға келіп, ойнау ұнайды. Өз елімнің намысын қорғау ¬– мен үшін үлкен құрмет. - Драфттың алдын ала тізіміне ену сен үшін нені білдіреді? Бұған әлем чемпионатындағы нәтижең себеп болды деп ойлайсың ба? - Алдын ала тізімге енгеніммен, бұл әлі ештеңені білдірмейді. Алда өз ойыныммен драфтта таңдалуға лайық екенімді дәлелдеуім керек, жай ғана тізімде болу жеткіліксіз. - ҰХЛ-да ойнауды армандадың ба, бала кезден үлгі тұтқан кумирің кім? - Әрине, бала кезімнен ҰХЛ-да ойнауды армандадым. Бұл – хоккеймен айналысатын әр баланың арманы. Балалық шағымда мен «Нью-Йорк Рейнджерс» пен «Чикаго» командаларына жанкүйер болдым, себебі онда менің сүйікті хоккейшім – Артемий Панарин ойнады. БАСТЫ БЕТКЕ ОРАЛУ