Jas Nomad. Жаттықтырушылардың біліктілігін арттыру курстары аяқталды

Астанада 5 жастан 7 жасқа дейінгі балалармен спорттық-сауықтыру кезеңінде жұмыс істейтін хоккей мектептері жаттықтырушыларының біліктілігін арттыру курстары мен аттестаттау аяқталды. Іс-шара JAS NOMAD хоккейшілерін даярлаудың 2023-2024 жылдарға арналған республикалық бағдарламасын енгізу жоспары шеңберінде ұйымдастырылды. 3-8 қараша аралығында онлайн-блок өтті, курстарды Өзбекстан мен Қырғызстаннан келген жаттықтырушылар да тыңдады. Екінші офлайн блок 13-19 қараша аралығында жалғасты. Елордаға Қазақстанның түкпір-түкпірінен 40 маман келді.

Сергей Козлов, Қазақстанның хоккей федерациясының ғылыми-әдістемелік бөлімінің басшысы:

- Апта қызу өтті, біз онлайн-курс аптасын, теориялық сабақтарды өткіздік. Осыдан кейін жігіттер Астанада жиналып, мұнда практикалық сабақтар аптасы өтті, олар екі блокқа бөлінді. Алғашқы екі күн – жаттықтырушылармен жұмыс, қатысушылар оқытушылар әкеп таныстырған жаттығуларды жасады. Және екінші блок – жаттықтырушылар балалармен жұмыс жасайды. Біз оларды бес адамнан сегіз топқа бөлдік және әрбір бестік мұзда, залда сабақ өтеді.

Қазақстанда мұндай іс-шара алғаш рет өтіп отыр, достық, қызу атмосфера. Барлық қатысушылар дән риза. Осы жерден көріп-білгендері олардың спорт резервін даярлаудағы жұмысында көмектеседі деп үміттенемін.

Семинарлар теориялық және практикалық бөлімнен тұрды. Мұзда, жаттығу залында сабақтар өтті. Сабақтарда хоккейшілерді даярлаудың физиологиялық-гигиеналық негіздемесі, психологиялық-педагогикалық даярлық, жаттықтырушыларға арналған практикалық нұсқаулық, ойыншыларды тамақтандыру және қалпына келтіру, бағдарламаны іске асырудың тиімділігін ғылыми-әдістемелік және медициналық-биологиялық бақылау, алғашқы медициналық көмек көрсету сияқты бағдарламаның бөлімдері кеңінен тарқатылды.

Александр Токарев, семинар қатысушысы, «True Hockey» хоккей мектебінің жаттықтырушысы:

- Апта қызу өтті, құрғақ жаттығулар, мұздағы жаттығулар бойынша пайдалы ақпарат көп болды. Сондай-ақ психология тұрғысынан да қызық болды. Барлығы жүйелі түрде, тамаша, өзіме көп нәрсені түртіп алдым. Мұндай кездесулер әрбір жаттықтырушы үшін пайдалы екені сөзсіз. Балалармен мұндай жаста тіл табысу, жаттығуларды ойын үлгісінде өткізу, кейде қаталдық таныту маңызды. Бұл кезеңде үлкен талаптар жоқ, бастысы, мұқият тыңдау, тырысып-бағу.

Іс-шаралар қорытындысы бойынша қатысушылар біліктілікті арттыру курстарынан өткені туралы куәлік, аттестаттаудан өткен жаттықтырушылар аттестаттау туралы куәлік алды.

Алдағы уақытта басқа жас санаттарымен жұмыс істейтін мамандар үшін: бастапқы даярлық кезеңінде (7-11 жастағы балалар), оқу-жаттығу кезеңінде (11-15 жастағы балалар) және спорттық-жетілдіру кезеңінде (15-17 жастағы балалар) курстар мен аттестаттау өткізу жоспарланып отыр.