Ғалым Мәмбеталиев: «Әрбірі барын салды, аянбады»

Қазақстан құрамасы әлем чемпионатындағы екінші жеңісіне қол жеткізді: матчтан кейінгі буллиттер сериясында Словакияны жеңді. Ұлттық құраманың бас бапкері Ғалым Мәмбеталиев өткен матчқа қатысты пікір білдірді:

- Бүгін мұз бетінде қалыптасқан команданы көрдім. Барлығы бір-біріне үйренісіп үлгерді. Барын салмай, жеңіс жоқ. Әрбірі барын салды, аянбады. Өзің психологиялық және функционалдық тұрғыдан дайын кезде әрбір қарсыласты жеңуге болады. Барлығы бір-бірі үшін ойнады, көмектесті, шайбаға кеудесін тосты.

Бірінші кезеңде қажетсіз гол өткіздік. Сол эпизодта жақсы ойнамадық, шайбаны лақтыруға болатын еді. Мұздан тыс сөйлестік, жігіттер өз іс-қимылдарын түзетіп, ойынға беріле бастады. Иә, кей жерлерде шыдам жетіспеді, аластатулар болды. Қарсылас жақсы, жылдам. Онда тәжірибелі жігіттер ойнайды. Буллиттерге дейін жеттік. Андрей Шутов жарады. Жігіттер өз буллиттерін салды. Жарады.

- Словакия жігіттері итерісіп, соқтығысып ойнайтынын білеміз. Жігіттерге не дедіңіз? Бұған мән бердіңіз бе?

- Иә, арқадан итереді дедік. Шыдаңдар. Бізге жеңіс керек. Тек жеңіс жолында ойнаймыз. Жігіттер шыдап-бақты, жақсы ойнады. Жарайсыңдар!

- Бүгін бірінші звено қуантты.

- Олар бүгін өздерін көрсетуі керек болды. Тәжірибелі жігіттер. Олар бұған дайын. Ізінен ерте білді. Жарады.

- Жанкүйерлердің тарапынан мықты қолдау болғанына келісесіз бе? Шудан құлақ тұнды.

- Жақсы ойнасаң, қолдау да жақсы болады. Жанкүйерлерге көп рақмет. Жігіттер оны сезінді. Жанын салып ойнады.

- Ертең қиынырақ бола ма? Ойынның барлық билеттері сатылып кетті, арена толады.

- Сонысымен қызықты болмақ. Жеңістен кейін көңіл күй әрдайым көтеріңкі болады. Жігіттер жеңістің қалай келетінін біледі. Тек барыңды салуың керек. Ең бастысы еңселері түспей, сол екпінпен жалғастырса болды. Барлығы жақсы болады.